سندويشات مقليه .. من مطبخي .. بالصور خطوه خطوه – من مطبخي

السندويشات المقليه

اليوم الله يسلمكم قررت اسوي ط³ظ†ط¯ظˆظٹط´ط§طھ ظ…ظ‚ظ„ظٹظ‡ .. قرأت أكثر من طريقه واعجبتني فقلت اسويها

نبدا بالمقادير:

3 كوب طحين منخول
ربع كوب زيت
3 ملاعق كبيره سكر
3 ملاعق كبيره حليب بودره (الحليب يمنع العجينه من تشرب الزيت اثناء القلي)
1 ملعقه صغيره خميرة
1 بيضه
ملح
ماء للعجن

الطريقه:

نخلط مقادير العجينه ونضيف الماء بالتدريج واحنا نعجن حتى نحصل على عجينة متماسكه …. ونستمر بالعجن مدة مو اقل من 5 دقائق حتى نضمن ان العجينه تكون معانا هشه

وهذا شكل العجينه بعد العجن … ونتركها ترتاح ساعه ونص تقريبا
العجينه ماراح ترتفع وايد مثل عجينة الفطاير العاديه لان كمية الخميره قليله واحنا معتمدين انها راح تنفش وترتفع اثناء القلي

في الوقت اللي كانت العجينه فيه ترتاح كنت افكر بحشوة سريعه ومالقيت اسرع من حشوة الاجبان الثلاثه وهي كالتالي:

نص كوب جبنة تشدر
نص كوب جبنة موتزريلا
نص كوب جبنة فيتا
2 ملعقه كبيرة مايونيز
نص ملعقه نعناع جاف او زعتر او ريحان (حسب ذوقك)

نخلط مقادير حشوة الجبن … ونجهز مع الحشوة شرائح الخيار والطماطم والخس … واذا تبين ممكن تحطين اي نوع خضار مثل الجزر وغيره

والحين بعد ما ارتاحت العجينه نفردها مثل الصورة ونقطعها بالشكل اللي نبي وانا قطعتها دوائر صغيره … وتركتها ترتاح 10 دقائق قبل القلي

الحين نيي لدور القلي وهو مرحله مهمه
لازم يكون الدهن عميق ودرجة سخونته معتدله حتى نضمن اللون الذهبي وارتفاع العجينه ونضجها من الداخل

والحين بدينا نسقط قطع العجين بالزيت الساخن

أثناء ما الفطاير في الزيت نبدا ناخذ من الزيت ونرشه على سطح الفطاير حتى ترتفع اكثر وتصير مثل الكره … وبس تبدا تشقر من تحت نقلبها على وجهها الثاني

ننتبه ان العجينه بسرعه تاخذ لون وبسرعه يصير لونها بني والافضل يكون ذهبي مثل الصوره

نطلعها من الزيت ونحطها على الصحن اللي فيه المناديل حتى تشرب الزيت الزايد ونتركها تبرد قبل ما نبدا بعملية الحشو

والحين بالمرحله اللي قبل الاخيره نبدا نقطع السندويشات وراح تكون هشه وخفيفه مثل القطنه ومفرغه من الداخل … مثل ما هو واضح بالصورة

نمسح حشوة الجبنه بالكميه اللي نحب ونحط شرايح الطماطم والخيار والخس

نصفها في طبق التقديم ونقدمها

الكل راح يحبها وتعجبه لانها خفيفه وهشه ولذييييذه

اتمنى تجربونها وتعجبكم