لاتقولين العذر – جميلة

لا تقولي العـذر دام العـذر أدهـى وأمـر
شايفتني طفل ولا أهبـل تبـي تستهبلينـي

ظنك انه منخلـق قبلـك ولا بعـدك بشـر
لا حبيبي فيه أحلى منـك تتمنـى تجينـي

ظنك انك لو تغليتـي بمـوت مـن القهـر
ما عد الا انتي على غفله تجين تقهرينـي

الكرامه كسرها مثـل الزجـاج اذا انكسـر
ما حسبتي لي حساب وكان قصدك تكسريني

تعرفين ان الرجل ما تلدغـه حيـة جحـر
مرتيين وجيتي انتي كان قصدك تلدغينـي

لعنبوا ابليسك علامك كلها اجروحك غـدر
تتبعين جنازتي مـن بعـد قمتـي تقتلينـي

جبت من ضلعي قلم واخذة من دمعي حبـر
وجبت من جلدي دفاتر قلت يمكن تفهمينـي

قلت ابكتب من قصيدي للحبيب اللي هجـر
يمكن يبطل عنـاده يمكـن يفكـر يجينـي

كم نصحتك لا تخوني في بدايـات الا مـر
ثم كررت النصيحه ما رضيتـي تسمعينـي

لين رحتي في خبر(كان)و(كان) لـك خبـر
ويوم طاح الفاس فوق الراس جيتي تطلبيني

ليه اخذ منك الحنان وبـدل بقلبـك حجـر؟!
ليه طاوعتي كلا مه يوم قال لك اتركينـي؟!

كانه اعطاك الكلام اعطيتك ادموعي مطـر
اتكلـم لـك لسانـه واتكلـم لـك بعينـي

وكانه اهدى لك هديه قبله اهديتـك عمـر
ما عطاك غير ليله يوم انا اعطيتك سنيني

اشتريت رضاك بدموعي واخذتيهـا مهـر
ويوم جففتي دموعـي ابتديتـي تحرمينـي

ما التفت لنفسي الا يوم جت ساعة صفـر
قلت ليه اذل نفسي عنـد واحـد مايبينـي!

مادم انـه خـان وعـده وبمحبتنـا كفـر
والله لا خليه يتمنـى يطالـع فـي جبينـي

اوعدك برحل بعيـد ولانـي بتـارك اثـر
وان سألتيني علامك قلت لـك لا تسألينـي

اوعدك حتى الرسايل كل ابوهـا والصـور
اني احرق نار فيها مثل منتـي تحرقينـي

وكل غلطه منك ببلعها ولـو كانـت جمـر
بلعب العبـه معاكـ واتحـدى تهزمينـي

حتى لو كانت تكلـف دم ودمـوع وسهـر
المهم انـي اذلـك قـد منتـي تجحدينـي

لا وازيدك من قصيدي بيت واعطيك الخبر
لو تبي حتى عذابي ماتشوفه مـن يدينـي